من طيب حظك طحتي بأيد رجال 

لا شاف عيب انسان غمض عيونه

رجال ماغنى على كل موال

لوخيبت سود الليالي ظنونه

الله عطاه من الخصال أجمل خصال

يبطون فيك الناس مايلحقونه

مايلتفت للشك والقيل والقال 

دون الكلام الشين سكر أذونه

رجال لكن عن ثمانين رجال

يضحك وتضحك عالخلايق جنونه

اليا وقف لك وقفته وقفت جبال

واليا قعد شال السما في متونه

واليا تعزوا معرب العم والخال

سالت على روس القبايل مزونه

يابنت ياللي كل مافيك يختال

شوفي مواريه وشوفي طعونه

عزت عليه الحال مايشكي الحال

بكى سواد الليل واضحك سنونه

العام كان بحال واليوم في حال

روس تقوم وروس تطيح دونه

وتأكدي ماكل رجال لاقال

غاب أو حضر بالكايده يذكرونه

غاليك شمس وباقي العالم ظلال

لو غاب لحظه كلهم يذكرونه

ناس رفعها للسما وصارت ابطال

وصاروا على كل اتجاه يجونه

مالوا ولكن الزمن فيه مامال

يعني بصريح القول ناس يبونه

لو خانته نفسه على كسر الانذال

وقت الشدايد عزته ماتخونه

ماعنده أي اشكال لو بعض الاشكال

تاكل معاه وبالظهر يطعنونه

لان الجبال جبال في وجه الاهوال

والحر يبقى حر.. لو يسجنونه

روحي ولو ليل الشقا بناظرك طال

تأكدي انك وحيده بدونه

وياعين عزي دمعك الخير بقبال

وش خانت الرجال تبكي عيونه

حمود جلوي

فزاع - حمود جلوي

اشعاار حمود جلوي

لأحلامي البارحه سولفت عن جرحي

عن عمري الغالي اللي ضاع بأسبابك

كن بغيابك غلاك أنهى على فرحي

الله يلعن غلاك ...// ويلعن غيابك

__ _ _ _

ياكثرهم قبلك أحبابي وخلاني

أعطيتهم دم قلبي بس خانوني

مشكلتي اللي بقلبي دوم بلساني

مقدر أشوف الخطأ وأسكر عيوني

_ _ _ _

ماعلموك شكثر بعدك يضايقني ؟

ماعلموك الجفا وإن طال ماأخونك ؟

كني أشوف الغلا للموت سايقني

وش حاجتي بالعمر لا عشت من دونك

_ _ _ _ _

إفرض إني جيت لك محتاج وعيوني تبيك

وإمنعتني لا أبين حاجتي لك عزتي

يعني المفروض تفهم مقصدي من قبل أجيك !

انتظرني كل ماطولت هذي حزتي

_ _ _ _

ابيك جنبي كل ما ضاق صدري

وأبيك فرحي لاقست سود الأيام

وقل للي مايدري وخليه يدري

إنك بعيني تسهر الليل وتنام

_ _ _ _

عيبك إنك كل منهو يجرحك تقول خير

راجع أيامك وحاول تفتكر منهو خسرت

مستحيل الحب الأول يشبه الحب الأخير

يبقى للأول مكانه غبت عنه أو حضرت

_ _ _ _

من تجربة حبك وصلت لقناعه

إذا بغيت إنسان يغليك .. خونه

يشتاق لك أربع وعشرين ساعه

دامك تخونه شرط تاخذ عيونه

_ _ _

من عقبها ماعاد لي خلق للناس

من يوم راحت راح قلبي معاها

فيني غلاهاشوصفه؟ ماله قياس

أقسم قسم إنه ذبحني غلاها

لو كان في وجه الزمن ذرة إحساس

ماكان لحظه عن عيوني خذاها

_ _ _

خل الجروح اللي بقلبك لقلبك

عندي من جروح الزمن ماكفاني

ولا تنشغل فيني وخلك بدربك

رب" عطاك من الصبر مانساني

_ _ _ _

ماجيت لك عاني عشان أتعداك

ولا تعديتك ... وأنا جيت عاني

ثمنت وصلك يوم جربت فرقاك

مره خسرتك مابي أخسرك ثاني

_ _ _ _

الجرح يكبر بقلبي وانت ماتدري 

والنوم يسهر بعيني يابعد عيني

حاولت أشيل الغياب وطحت من كبري

حاولت أغيب ولقيتك حاضر" فيني

_ _ _ _ _

تدري إني قبل أعرفك كنت محتاجك وأبيك

كنت أدور في وجيه الناس عنك واستحيتك

وينك إنت جابك الله من زمان أسأل عليك

وراسك الغالي لقيت عيوني أول مالقيتك

_ _ _ _ _

يللي وصالك موت ومفارقك موت 

قلي شسوي فيك لاصرت غالي

تعبت انادي واردف الصوت بالصوت

كني مع حالي اسولف لحالي

_ _ _ _ _

مع السلامه حبيبي والعذر منك

كل شي أشوفه على فرقاك يجبرني 

صور الشاعر حمود جلوي

نور

ياطاري الغالين اذا مرتك نور

سولف لها عن حبها عن غلاهــا

عن واحد مسك عشاشيقه الدور

في قلب ماينبض لشخص سواهــا

الجهراء

حزينه ليه يالجهرا علامك يابعد عمري؟؟

علامه جوك الليله كئيب ومظلم بعيني ..؟

أنا جيتك وأنا مثلك حزين وضايق صدري

أبشكي عن همومي وابي صدرك يواسيني ..

إلا مني زعلت وضقت أنا والله من عذري

ترى ماجيت لك ألا وانا ادري ماتخذليني ..

"غليتك من غلا منهو سكن بك" والغلا يسري

مثل ماجيت لك ساري غلاهم ساري فيني ..

ألا يالجهرا قولي وينه اللي شاغل فكري؟؟

هذاك اللي على شانه غديتي كل عناويني ..

هذاك الحب من قبله على بالي ولا يطري

ومن عقبه ملكني بالغرام ودمر سنيني ..

تركني وماعرف من عقبه شاللي غدا يجري!!

أحس اني فقدته أو عطيته شخص بإيديني ..

ترك لي يوم فرقاه رساله قبل لايسري

قبل هاليوم بأسبوعين يومنه يلاقيني ..

وضحك لي يافديت الضحكه اللي نورت عمري

ووعدني مايخليني وقال إنه يب يجيني ..

وراح وتتبعه عيني ألا مقواك ياصبري

عسى ماهي بدايات النهاية بينه وبيني ..

ألا يايوم هالجمعه إبد ماانت على خبري

كئيب "وشوفة الجهرا أبد ماعاد تغريني" ..

أحس بعبرة تملا عيوني ودها تجري

على خدي وأحس الكون ضايق مايكفيني ..

تصافق بي هواجيسي أبيع بحسرتي وأشري

غديت أدور بالجهرا ولا أدري أنا ويني ..

سرحت وراحت أفكاري تشتتني وأنا مدري

صحيت ولا وعيت إلا وصوت به يعزيني ..

ترى بدري على علوم السعادة والفرح بدري

مدامه غايب عني أبد ماشي يغنيني ..

أمانة ليه يالجهرا حزينة يابعد عمري

وأذا حزنك على الغالي طلبتك لاتخليني